Suplemen Bahan Khotbah GBKP Klasis Riau Sumbar Minggu, 24 Januari 2016 (Septuagesima/Pepitupuluhken)

Khotbah: Lukas 4:14-21, Tema: Dibata Nggenapi PadanNa, Malem Ateta

   Lit sekalak filsuf ngatakensa, “Mungkinkah selembar daun yang kecil dapat menutupi dunia yang luas ini? Menutupi telapak tangan saja sulit. Tapi kalau daun itu menempel di mata kita, maka tertutuplah bumi. Begitu juga bila diri kita ditutupi dengan pikiran buruk sekecil apapun, maka kita akan melihat keburukan di mana-mana. Jangan pernah menutup mata kita, walau hanya dengan daun yang kecil. Jangan pernah menutupi diri kita dengan sebuah pikiran yang buruk, walau seujung kuku. Bila kita menutup diri, maka tertutuplah semua”. Kata enda lit perpayona ibas teks Lukas 4:14-21, uga tanggapen kalak Nazaret nandangi pendahin Tuhan Jesus. Kata Dibata situlisken nabi Jesaya payo e harapen kerina kalak Jahudi sienggo ndekah tertaban bangsa Romawi sierbahansa kalak Jahudi nggeluh mesera ibas kerina bidang geluhna. Tapi siakap kalak Jahudi enda sila payo eme diri Jesus e merupaken penggenapen padan Dibata sienggo ibelaskenNa ibas masa nabi Jesaya. Kerina kalak enda nandai Jesus alu payo ras lalit siterbuni. Mulai ibas masa anak-anak silabo berbeda ras anak-anak sidebanna, pendahin nande ras bapana terus ku biak-biak keluargana kerina metehsa. Kai hobbi ras pangan si paling igemarina pe kerina kalak metehsa. Apalagi ibas Rumah Pertoton e lit sangkep geluhna simeteh kerina situasi geluhna, mis kal urak akapna harga dirina. Intina, Secara manusiawi wajar kal kerina kalak Nazaret enda merawa nandangi Jesus erkiteken padan Dibata ibas pikirenna e badia terwujud ibas sekalak manusia biasa sila berbeda ras dirina. Sebab pikiren kalak Jahudi kerehen Mesias e sebanding ras diri Raja Daud ibas kerina kemegahenna. 

 
Mesias e ibayangken sekalak pemimpin bangsa Yahudi siberkarisma si membentuk mulihi kejayaan kerajaan Israel ibas masa raja Daud ras Salomo. Sebab kalak sibage nge maka banci kai sipadanken Dibata arah nabi Jesaya banci tersehi. Alu bage, pikiren kalak Jahudi e erbahansa lanai ia ngidah kuasa Dibata ras rencana Dibata sebab melulu padan Dibata e payo adi bagi konsep silit ibas pikirenna bage pe sura-surana. Memang adi siukuri cukup motu Dibata jadi sekalak manusia biasa, mate ibas kayu persilang ras ngenanami kiniseran. Tapi ula kita salah, ibas motu pe Dibata e banci iberekenNa keselamaten man kerina manusia ras doni enda, uga adi icidahkenNa kepentarenNa ras kinibisanNa? Lanai terukuri kita kai siterjadi nandangi kegeluhenta. Memang labo man ukuren tapi perlu si imani.  Ternyata pola pikirta menentuken apakah padan Dibata e erbahansa malem ateta ntah padan Dibata e enggo pe seh ras sialoken tapi lalap la ateta malem. 

   Teridah maka padan Dibata e tuhu-tuhu terwujud ibas diri Tuhanta Jesus Kristus sepanjang pelayanenNa selama lebih kurang 3.5 tahun. Asal bergerak Tuhan Jesus e mis kal ernanam man sekelewetna. Kalak sisakit ibas erbage-bage pinakit mis alokenna kesehaten. Kalak sisetanen mis pulah ibas kuasa setan nari. Kalak simelala perbebenna mis idatkenna dalan pulah arah pengajarenNa. Kalak sibujur akapna bana mis rukur maka ia pe perlu pertobaten. Intina, asal ia erdalan-dalan mis jadi tambar man kalak sibenatasiNa, subuk tambar man daging kulana bage pe tambar man pertendinna. emaka kalak singgejapken maka ibas diri Jesus eme penggenapen janji Dibata ialokenna kemalemen ate. Kai siturikenNa ibas Rumah Pertoton i Nazaret tuhu-tuhu terealisasi ibas pelayanenNa ibas belang-belang daerah kalak Jahudi. Saja ngenca la itulisken ijenda uga kedungenna sikap kalak Nazaret ibas pelayanen sienggo icidahken Jesus. Tapi adi lalap labo berubah pola pikirna maka lalap labo malem atena. 

   Anne Frank pernah ngatakensa, maka lit dua hal siharus lit ibas kegeluhen kinitekenta eme Kecerdasan Iman eme mengenal Tuhan dengan benar ras Kecerdasen Pengharapen eme ngendesken geluhta kubas rencana Dibata. Ibas sada ungkapen ikatakenna, Tuhan, ajarlah aku menerima apa yang tidak bisa aku ubah dan kuatkan aku atas apa yang bisa aku ubah. Aminna pe ia sepanjang geluhna lit ibas sakit pinakit malem atena nggeluh erkiteken lit sura-sura Dibata simbelin ibas pinakit silit ibas ia sibelinen asangken pinakit e. Alu bage padan Dibata e mbaba kemalemen ate ibas geluhna. 

   Mungkin pernah kita rukur bagi kalak Nazaret maka padan Dibata eme berupa hal spektakuler simbaba perubahen secara instan ibas geluhta. Lupa kita maka padan Dibata e banci jadi enggo ilebe-lebe matata tapi la siidah, enggo rusur sibegi tapi la sidiate, enggo sialoken tapi la ernanam, enggo ngarak-ngarak geluhta tapi la tergejap. Mari sibuka mata kinitekenta, maka situhuna Dibata e enggo mereken siterbaik ibas kegeluhenta alu namaken kepentingen pribadita bagian ibas rencana Dibata. Ula sibahan dirinta focus utama tapi sibahan Dibata jadi focus utama ibas kerina silakoken kita maka pasti sigejapken ras siidah maka rencana Dibata e tuhu-tuhu mbelin man banta manusia. Laptop, hp ras computer  rusur hang erkiteken melala virus simerusak systemna emaka perlu anti virus ras refresh segelah banci normal mulihi. Bage pe kita adi enggo melalasa virus silit ibas ukurta, pikirenta erbahansa rusur kita hang perlu kita mulihi refresh ras ngendesken geluhta kubas anti virus situhu-tuhu eme kata Dibata. Malem ateta adi padan Dibata terjadi ibas geluhta man kita singendesken geluhta man Tuhan. 

   Pdt Julianus Meliala STh
   GBKP Bukit Raya Pekanbaru